„6 часа работа, 6 часа култура, 6 часа активизам, 6 часа одмор“ е застапувачки предзнак на шестото издание на фестивалот за феминистичка култура и акција ПРВО ПА ЖЕНСКО.
Унапредувањето на работничките права на жените, вреднувањето на неплатениот домашен труд на нашите сограѓанки, изнаоѓањето начини за свесно давање отпор на современите и некогашни облици на експлоатација и девалвирањето на трудот и достоинството, се прашања што го оформуваат тематскиот фокус на овогодишниот фестивал.
ПРВО ПА ЖЕНСКО од 3-6 мај 2018 ќе биде домаќинка на гости, кои размислуваат за овие суштински прашања.
ПРОГРАМА ⤵️
||| 3 мај – четврток |||
12:00 · плато пред МКЦ
ДИСКУРЗИВНА ПРОГРАМА
___________________________________
Разговори помеѓу жени со исти интереси и заложби. Се прашуваат едни со други и изнаоѓаат заеднички позиции за
делување.
За женската солидарност и социјалното претприемништво:
Драгана Каровска Чемерска (H.E.R.A.) и Јелена Вишњиќ (BeFem);
За текстилните работнички:
Кристина Ампева (Гласен Текстилец) и Мила Царовска, Министерка за труд и социјална политика;
За сексуалните работнички:
Наташа Бошкова (Коалиција Маргини) и Славјанка Петровска од Министерство за внатрешни работи
21:00 · кино Фросина, фоаје на кат
ОФИЦИЈАЛНО ОТВОРАЊЕ НА ФЕСТИВАЛОТ
___________________________________
ИЗЛОЖБА: Ćemo, ćemo… ja, ma kako ćemo?!
Божена Кончиќ Бадурина, Дуга Мавринац
Авторките на амбиенталната инсталација го актуелизираат прашањето за неплатениот домашен труд. Презентираната содржина произлегува од заедничкото етнографско истражување на работата на хрватските негувателки на стари и изнемоштени лица во Италија, и ја актуелизира и проблематизира невидливоста на работничките во домот во секојдневниот и јавниот говор, особено нивната незаштитеност во институционални рамки.
___________________________________
ИЗЛОЖБА: Куварици
NEpraktične žeNE
Занаетчиското здружение ги здружува женските, машките и останатите верзии на везени НОВИ КУВАРИЦИ. Кувариците на NPŽ се изложуваат како на жици за пружање алишта, на улични акции, селски панаѓури, така и во училишта и пензионерски домови, како на активистички собири и протести така и во светски галерии, музеи и саеми за дизајн.
21:30 · плато пред МКЦ
ЛЕЗФЕМ СЛЕМ
___________________________________
Неформалната група ЛезФем традиционално ја зазема сцената на ПРВО ПА ЖЕНСКО со веќе добро познатиот ЛезФем поетски слем. Пишувањето, споделувањето и славењето на женската поезија е нашиот чин на градење нови, слободни простори и реалности. Очекувајте едночасовен оган на подиумот предизвикан од моќни, гласни, љубовни, квир, борбени и провокативни стихови од женските гласови на градот.
||| 4 мај – петок |||
19:00 · кино Култура
ПРЕДАВАЊЕ: Уметничките институции и еднаквоста во собирите, Бојана Кунст
соработка со LOKOMOTIVA-Centre for New Initiatives in Arts and Culture
___________________________________
Во своето предавање, Кунст ќе се фокусира на нападите врз уметничките институции, претстави, изведувачки фестивали и други уметнички настани, поврзани со порастот на популизмот и национализмот во Европа.
21.00 · кино Фросина
ПРЕТСТАВА: Кралици, БеоАрт
соработка со MOT theatre festival
___________________________________
„Кралици“ на Дарко Лукиќ на повеќе полиња и со различни жанровски предзнаци ги промислува проблемите на шовинизмот, војната, достоинството на интелектуалецот, пријателството, љубовта, духовноста… и прашањето што сѐ е подготвен човекот да направи за да преживее?
22.30 · плато пред МКЦ
DJ СЕТ на Ивана Драгшиќ
___________________________________
(https://www.mixcloud.com/ivana_dragsic/)
||| 5 мај – сабота |||
19:00 · кино Фросина, фоаје на кат
ПРЕДАВАЊЕ/ПЕРФОРМАНС: „NEpraktične žeNE“
___________________________________
NEpraktične žeNE ги претставуваат своите дела низ обичен кујнски разговор: од еден до друг вез, нижат приказни за причините на тие мали побуни на запишување на вистината и нејзино јавно искажување. Некаде тоа се нарекува трач-седенка, некаде предавање-перформанс, некаде kaffeeklasch. Секако – дојди да ти кажам искрено.
20.00 · кино Фросина
ФИЛМСКА ПРОГРАМА: проекција на „Сонување во капитализам“, Софи Бруне
селекција на филм Кумјана Новакова
___________________________________
Дванаесет луѓе се навраќаат на своите соништа поврзани со работата и се обидуваат да го толкуваат нивното значење. Овие измачени души на поетски и политички начин го опишуваат своето лично страдање на работното место. Сонувачите и нивните соништа полека го разоткриваат светот во кој доминира неолибералниот капитализам.
22:00 · плато пред МКЦ
КОНЦЕРТ: Фосфен // Fosfen (МК), DIVES (AT) и Replicᴜnts (RS)
соработка со Iskra Tourbooking
___________________________________
Женски здружени со ISKRA Tourbooking ве носиме на музичко патување и запознавање со нови квалитетни артист(к)и од домашната и европската музичка сцена.
||| 6 мај – недела |||
13:00 · плато пред МКЦ
БАЗАР
___________________________________
Слободен простор за презентација на возбудливите ракотворби на нашите омилени домашни креативци. Не заборавајте да си ја понесете заштедата, ќе ви треба.
13:00 · плато пред МКЦ
DJ СЕТ на Јана, Мартина и Роберта
___________________________________
Овие љубителки на добра музика и точаци се вистински урбан Girl Gang. Можете да ги лоцирате на некои од следниве локации: Мартина позади фус, добош, бас и неколку чинели, Роби позади шанкот на МКЦ и Црно Кафе, Јана некаде низ скопскиот метеж додека манијачки вози точак и пробува да го смени светот. Во недела ќе ги најдете на ПРВО ПА ЖЕНСКО, каде што здружено настапуваат со својот целодневен диџеј сет.
15:00 · плато пред МКЦ
КУЛИНАРСКА ИЗЛОЖБА: „Неделниот ручек како репродуктивен труд“
Концепт: Кире Василев и Кристина Леловац
___________________________________
Оваа изложба има за цел да го потврди аргументот на некои феминистики дека непродуктивниот труд е подеднакво важен како и продуктивниот труд, кој во капиталистичките социјални односи може да се комодификува и монетизира. На публиката ќе и биде послужен комплетен неделен ручек, презентиран не само како уметничко дело, туку и како производ на нечиj труд кој има сопствена вредност.
17:00 · плато пред МКЦ
ПРЕЗЕНТАЦИЈА: работилница за деца „Почетен курс за бунтовници“ и промоција на книга: „Приказни за добра ноќ за бунтовни девојчиња”
соработка со Колектив Ветерница и Ars Lamina
___________________________________
Целта е поттикнување на работа во група, солидарност и соработка без разлика на родова припадност, развој на фантазијата и креативноста, и освестување на важноста на создавањето на еднаков свет за сите. Инспирацијата доаѓа од првото издание на македонски јазик на книгата „Приказни за добра ноќ за бунтовни девојчиња“ која својата промоција ја има токму на ПРВО ПА ЖЕНСКО.
20:00 · кино Фросина
ПЕРФОРМАНС: „Како мојот живот стана културен работник – културните работници ја заземаат сцената“
Биљана Тануровска Ќулавковски и Ивана Васева
___________________________________
Недостатокот од работни услови кој продуцира непостојан, несигурен или прекаријатен начин на работа и постојаната преокупација со професионалните ангажмани е една од главните теми на овој специфичен перформанс кој има за цел да ги нагласи и истакне условите и контекстот во кој работат самостојните културни работници.
21.30 · Денсинг сала
КОНЦЕРТ: akua naru
соработка со Taksirat Festival
___________________________________
AKUA NARU • МКЦ, Скопје (билети по цена од 500/600 ден.)